..متابعة// محمد شومان
اكتر ما بتكون للحاضر، أنت بتصدر القرار عشان تحمي ثوابت آلية المنظومة ف السنين المقبلة. بتصدر القرار لتثبيت هوية المنظومة اللي تأسست بفضل قرارات تاريخية صدرت من عشرات السنين واللي بدورها انت واقف النهاردة ع أرض صلبة ذات هوية قوية ودورك تحميها وتسلمها للأجيال اللي بعدك بكامل قوتها. عشان الأجيال دي وقت ما تقابل حدث كبير يلاقوا في أرشيف تاريخهم شئ يستمدوا منه قوتهم زي ما بتعمل أنت النهاردة وبتقدم للمستقبل قرار تاريخي بإسم كبير زي حسام عاشور.
بس قبل القرار ده ما يصدر وتظهر الإدارة في صورة متوحشة بحق أبناء النادي لازم نعرف الاول مين اللي تجني ع تاريخه ومين اللي سعي للحفاظ عليه.
مين اللي سعي للإبقاء ع وجوك يا عاشور؟ مين اللي حافظ عليك طيلة عامين ومحدش طالبك بالرحيل بعد انتهاء مخزونك الفني!!
مين عقد جلسة مع فايلر عشان يقنعوه بالتجديد لكنه رفض وقال إنك مش هتدخل حتي التدريب لو تم التجديد ليك.
حتي بعد قرار فايلر محدش طالبك بالرحيل.. لأ طالبوك بالإعتزال في الأهلي كتقدير ل لاعب كامل مسيرته الرياضية كانت بفانلة النادي الأهلي وأحد ابنائه.
مين اللي قدملك عروض إستثنائية يحتويك من خلالها متقدمتش ل لاعب واحد من الجيل الذهبي! مين اللي كسر بروتوكول النادي عشانك وقال هنعملك ماتش إعتزال عائده يكون لحسابك!!
مين اللي شاف إن تقديرا واحتراما لتاريخك الكبير لازم يتم إعدادك ك كادر إداري وقدملك عرض معايشة في أي نادي اوروبي تختاره!. مين سعي إنك تكون كادر إعلامي وخصص ليك مكان في قناة النادي بأجر!!
مين سعي انه يأمن مستقبلك ويأمن تاريخك وإن علاقتك بالنادي والجمهور متوقفش عند كونك لاعب فقط لكن مين اللي اختار العلاقة دي ف النهاية؟
مين سمح إن شأن خاص بالأهلي يتم تناوله ف الإعلام وبعضهم يتاجر ويزايد بإسمك ع حساب النادي لمدة شهرين ورغم كده مكنش ف أي رد حاسم منك بل كان كلامك إنك عايز تكمل وإنك لسه بتفكر.
الحقيقة إنك أنت أول شخص أساء لتاريخه وقت ما طلبت التجديد حتي لو مش هتلعب وده شئ ميصدرش من لاعب بحجمك قبل ما يكون غلط إنه يحصل! وإن الإدارة اللي اتهمتها بعدم الوفاء بالوعد هي أول من تحركت للحفاظ ع تاريخك بما سبق ذكره.
أنت كمان محسمتش أمرك بناءا ع عرض النادي لأ.. أنت حسمت أمر إعتزالك بعد تدخل ترك آل الشيخ وتقديم عرض ليك بتولي مباراة اعتزالك مقابل عائد مالي يتخطي ال20 مليون جنية وهنا صدرت موافقتك.
مين بقي اللي غض بصره عن عدم تقديرك لعروضه الاستثنائية وإن أمرك حُسم بناءا ع عرض ترك، ووافق ع المشاركة ف ماتش الاعتزال مع فريق الميريا الإسباني. مين اللي كان لحد اللحظة دي بيتحرك من دافع دعمك وإن ده شئ ف مصلحتك.
إستعجلت ع جواب المشاركة ليه؟ ايه فائدة مراجعة جواب مشاركة بخصوص ماتش مجهول الظروف؟ ايه الضرر ف تأخير 4 ساعات بالنسبة لماتش غير معروف ميعاده!!
فرضا إن الأهلي كان صدر منه ليك موافقه شفهية فقط وقالك وقت الإعداد للمباراة هنصدر جواب المشاركة بشكل رسمي هل ده كان شئ غلط ف ظل الظروف اللي بيعيشها النشاط الكروي!
لكن الأهلي صدر منه جواب مشاركة رسمي انت نفسك اطلعت عليه واتعطل بسبب امضاء الخطيب اللي قالولك إنه مع حفيده ف المستشفي. هل الشخص اللي انتظر قرارك لمدة شهرين وقدرك بشكل كبير ميستحقش منك شوية صبر!
هل لو كان ف نية بعدم الموافقة ونقض العهد زي ما قولت هل جواب المشاركة كان هيخرج. هل ده تصرف يليق بيك من الأساس!
إستعجالك الصبياني المريب اللي حكيته بالظبط مش سبب عقابك، السبب هو ظهورك في فيديو إرتكبت من خلاله خطأ في الوقت الغلط، شككت ف النوايا وهاجمت الإدارة واخترقت الحظر الإعلامي واستعرضت تاريخك ومواقفك كإنك بتمن ع الأهلي وجمهوره. طالبت بحقك ف ماتش الاعتزال وكأنه شئ مفروض ع الأهلي ومجبرين عليه.
كل ده حصل منك ف وقت الإدارة فيه بتتهاجم من شخص أنت واقف ف صفه وبتتحرك بناءا ع رغبته. تصرف غلط ف الوقت الغلط أظهرت فيه ضحالة فكرك وعقليتك اللي أكيد متناسبش شخص هيكون كادر إداري وإعلامي للنادي و بناءا عليه كان رد فعل الإدارة.
الحقيقة إنك دفعت تمن سذاجتك والإدارة دفعت تمن إحترامها الزائد ليك والجمهور دفع تمن التمجيد بناءا ع عطاء الملعب فقط دون النظر للعقلية لكنه قادر يحول كامل تاريخك ومجدك لمجرد أرقام مركونة في الأرشيف هيعفي عليها الزمن وكل اللي هيتبقي من تاريخك هو إنتساب اسمك لموقف تأديبي وقرار تاريخي الناس هتردده عشان تنصح بيه ف يوم من الأيام شخص ساذج هيحاول يكرر موقفك
إرسال تعليق